امریکہ کے مختلف شہروں میں ایران کے ساتھ ممکنہ جنگ کے خلاف اور حکومتی پالیسیوں کے خلاف بڑے پیمانے پر احتجاجی مظاہرے کیے گئے۔ واشنگٹن ڈی سی، نیویارک اور لاس اینجلس سمیت متعدد شہروں میں لاکھوں افراد سڑکوں پر نکل آئے۔
مظاہرین نے ڈونلڈ ٹرمپ کی پالیسیوں کے خلاف شدید نعرے بازی کی اور مشرقِ وسطیٰ میں فوری جنگ بندی کا مطالبہ کیا۔ اطلاعات کے مطابق "نو کنگز” کے عنوان سے ہونے والے ان مظاہروں میں تقریباً پچاس ریاستوں میں تین ہزار سے زائد احتجاجی اجتماعات منعقد ہوئے۔
مرکزی مظاہرے نیویارک، لاس اینجلس اور واشنگٹن میں ہوئے جہاں مظاہرین نے جنگ مخالف بینرز اٹھا رکھے تھے اور حکومت سے پالیسیوں میں تبدیلی کا مطالبہ کیا۔ مجموعی طور پر ان مظاہروں میں لاکھوں افراد نے شرکت کی اور امن کے حق میں آواز بلند کی۔
دوسری جانب یورپ اور دیگر ممالک میں بھی احتجاجی مظاہرے دیکھنے میں آئے۔ یونان، اٹلی، فرانس، اسپین، جرمنی، نیدرلینڈ اور آسٹریلیا میں بھی لوگوں نے سڑکوں پر نکل کر جنگ کے خلاف احتجاج کیا اور ٹرمپ کی پالیسیوں کو تنقید کا نشانہ بنایا۔
