پاکستان ٹیلی کمیونیکیشن لمیٹڈ (پی ٹی سی ایل) نے اعلان کیا ہے کہ سب میرین کیبل کی مرمت کا کام شروع کر دیا گیا ہے، جو 20 اپریل تک جاری رہے گا، جس کے دوران انٹرنیٹ سروس متاثر ہونے کا خدشہ ہے۔
پی ٹی سی ایل کی جانب سے جاری بیان کے مطابق یہ مرمتی کام بین الاقوامی کنسورشیم کے تعاون سے انجام دیا جا رہا ہے، جس میں کمپنی کے ماہرین حصہ لے رہے ہیں۔
بیان میں کہا گیا ہے کہ مرمت کے دوران خاص طور پر شام کے اوقات میں انٹرنیٹ کی فراہمی میں تعطل آ سکتا ہے۔ صارفین کو ممکنہ سست روی اور کنیکٹیویٹی مسائل کا سامنا کرنا پڑ سکتا ہے۔
پی ٹی سی ایل نے صارفین سے اپیل کی ہے کہ وہ اس دوران صبر و تحمل سے کام لیں، جبکہ کمپنی کا کہنا ہے کہ مرمتی کام مکمل ہونے کے بعد سروس معمول پر آ جائے گی۔
