وزیر اعظم محمد شہباز شریف سعودی عرب، قطر اور ترکیہ کے کامیاب دورے کے بعد لاہور پہنچ گئے۔ وزیراعظم سعودی عرب، قطر اور ترکیہ کا دورہ مکمل کرکے انطالیہ سے واپس پاکستان پہنچے ہیں ۔
ائرپورٹ پر وفاقی وزیرداخلہ محسن نقوی، سینئر صوبائی وزیر مریم اورنگزیب اور سینئر ایڈوائزر پنجاب علی ڈار نے وزیر اعظم محمد شہباز شریف کا استقبال کیا ۔
قبل ازیں ترکیہ کی وزارت خارجہ کے ڈی جی سفیر تولگا برمیک، سفیر نیلوفر کیگسیز نے وزیرِ اعظم کو رخصت کیا۔ اس موقع پرترک پارلیمنٹیرین برہان قایاترک اور ترکیہ میں پاکستانی سفیر ڈاکٹر یوسف جنید بھی موجود تھے ۔
وزیراعظم کا تین روزہ دورہ سعودی عرب، قطر اور ترکیہ کے دوروں پر مشتمل تھا۔ دورہ کے دوران نائب وزیر اعظم محمد اسحاق ڈار، وزیراطلاعات و نشریات عطاء اللہ تارڑ، معاون خصوصی سید طارق فاطمی اور وزیراعظم کے ترجمان برائے غیر ملکی میڈیا مشرف زیدی بھی وزیراعظم کے ہمراہ تھے ۔
