دنیا میں پاکستان کا ایک اور اعزاز، چینی خلائی پروگرام کیلئے دو پاکستانی خلا باز منتخب، چین روانہ

چین نے اپنی انسانی خلائی پروگرام کے لیے دو پاکستانی خلا بازوں کو بطور امیدوار منتخب کرلیا، دونوں امیدوار تربیت کے لیے چین روانہ ہو گئے۔ چین کے سرکاری نشریاتی ادارے نے اپنی رپورٹ میں اس بات کی تصدیق کی ہے۔ ان دو پاکستانیوں میں خرم داؤد اور محمد ذیشان شامل ہیں جو چین روانہ ہوئے ہیں۔
یہ پیش رفت پاکستان کے خلائی تحقیق کے سفر میں اہم سنگ میل کی حیثیت رکھتی ہے، اس پیش رفت کے بعد پاکستان ان محدود ممالک کی صف میں شامل ہوگیا ہے جو انسانی خلائی پروازوں کے پروگرام میں فعال کردار ادا کر رہے ہیں۔ پاکستان پہلی بار چین سپیس سٹیشن کے مشن میں شرکت کی تیاری کررہا ہے، یہ مشن 2026ء کے آخر میں متوقع ہے جس میں ایک پاکستانی خلا باز شین زو مشن کے دوران بطور پے لوڈ ایکسپرٹ ذمہ داریاں انجام دے گا۔
چائنہ سپیس سٹیشن پر مشن کے دوران پاکستانی خلا باز مائیکرو گریویٹی میں متعدد سائنسی تجربات انجام دے گا، ان تجربات کا دائرہ کار اہم شعبوں پر مشتمل ہوگا جن میں مٹیریل سائنس، فلوئیڈ فزکس، لائف/بائو سائنس اور بائو ٹیکنالوجی شامل ہیں۔ ان تحقیقات کے نتائج ماحولیاتی تبدیلی سے نمٹنے، غذائی تحفظ کے فروغ اور صنعتی جدت کے شعبوں میں اہم کردار ادا کر سکتے ہیں، وزیراعظم شہباز شریف نے سپارکو کی خلائی تحقیق کے فروغ کی جانب اہم پیشرفت کو سراہا ہے۔