پاکستان میں ایران کے سفیر رضا امیری مقدم نے خطے میں امن کے قیام کے لیے پاکستان کی کوششوں کو سراہتے ہوئے کہا ہے کہ پاکستان نے امریکا کے ساتھ کشیدگی میں کمی اور جنگ بندی کے لیے مثبت کردار ادا کیا ہے۔ انہوں نے وزیراعظم شہباز شریف، فیلڈ مارشل عاصم منیر اور پاکستانی عوام کا شکریہ بھی ادا کیا۔
ایرانی سفیر کا کہنا تھا کہ ایران کے وزیر خارجہ عباس عراقچی کا دورۂ اسلام آباد انتہائی اہم اور مفید ثابت ہوا، جس کا مقصد خطے کی موجودہ صورتحال اور امن کے قیام کے لیے پاکستانی حکام سے مشاورت کرنا تھا۔
رضا امیری مقدم نے مزید کہا کہ ایرانی وفد کو دورۂ اسلام آباد کے دوران مکمل سیکیورٹی اور پرامن ماحول فراہم کیا گیا، جو دونوں ممالک کے درمیان مضبوط اور دوستانہ تعلقات کا عکاس ہے۔ انہوں نے اس عزم کا اعادہ کیا کہ ایران اور پاکستان خطے میں امن و استحکام کے لیے مشترکہ کوششیں جاری رکھیں گے۔
