اسلام آباد: وزیراعظم محمد شہباز شریف کی زیر صدارت سرمایہ کاری میں اضافے اور معیشت کی مجموعی ترقی کے لیے شعبہ جاتی اصلاحات اور پالیسی اقدامات پر جائزہ اجلاس منعقد ہوا۔
اجلاس میں مختلف وزارتوں کی جانب سے زیر غور پالیسی تجاویز پر بریفنگ دی گئی۔
وزیراعظم شہباز شریف نے اجلاس سے خطاب کرتے ہوئے کہا کہ ملکی معیشت کی پائیدار ترقی کے لیے صنعت و حرفت کا فروغ اور بیرونی سرمایہ کاری میں اضافہ ناگزیر ہے۔
انہوں نے کہا کہ صنعتی مصنوعات کی ملکی پیداوار بڑھانے کے ساتھ ساتھ برآمدات میں اضافے کے لیے مؤثر پالیسی اقدامات حکومت کی ترجیحات میں شامل ہیں۔
وزیراعظم کا کہنا تھا کہ صنعت، تجارت اور معیشت کے مختلف شعبوں میں اصلاحات کو طویل المدتی معاشی افادیت اور عوامی فلاح پر مرکوز ہونا چاہیے۔
انہوں نے ہدایت کی کہ مستقبل کی توانائی ضروریات کو متبادل توانائی کے ذرائع سے پورا کرنے کے لیے جامع حکمت عملی پر بھرپور انداز میں کام جاری رکھا جائے۔
شہباز شریف نے کہا کہ توانائی کی بچت اور سستی ٹرانسپورٹ کی ملکی ضروریات پوری کرنے کے لیے جامع اور مؤثر الیکٹرک وہیکلز پالیسی وقت کی اہم ضرورت ہے۔
انہوں نے تمام وزارتوں کو ہدایت کی کہ جدید ٹیکنالوجی کو مختلف شعبوں میں شامل کرنے کے لیے ماہرین کے ساتھ بامعنی مشاورت کو یقینی بنایا جائے۔
وزیراعظم نے زور دیا کہ مؤثر ترقیاتی پالیسیوں کی تشکیل اور نفاذ کے لیے تمام وزارتیں باہمی تعاون اور ہم آہنگی سے کام کریں، جبکہ تمام اصلاحات اور اقدامات میں انتظامی شفافیت اور بہترین کارکردگی حکومت کی اولین ترجیح ہونی چاہیے۔
اجلاس میں نائب وزیراعظم و وزیر خارجہ سینیٹر محمد اسحاق ڈار سمیت وفاقی وزرا اور متعلقہ اداروں کے اعلیٰ حکام نے شرکت کی۔
