کویتی حکام نے کویت ایئرپورٹ پر ہونے والے مبینہ ایرانی ڈرون حملے کی سرویلنس فوٹیج جاری کر دی ہے، جس میں ایک ڈرون کو ایئرپورٹ کی عمارت سے ٹکراتے اور اس کے بعد زور دار دھماکہ ہوتے دیکھا اور سنا جا سکتا ہے۔
کویتی حکام کے مطابق حملے کی مختلف زاویوں سے ریکارڈ کی گئی ویڈیوز منظر عام پر لائی گئی ہیں۔ فوٹیج میں ڈرون کے ایئرپورٹ کی عمارت سے ٹکرانے کے بعد دھماکے کی آواز واضح طور پر سنائی دیتی ہے۔
حکام کا کہنا ہے کہ اس حملے میں ایک شخص ہلاک جبکہ 63 افراد زخمی ہوئے۔ ابتدائی تحقیقات کے مطابق واقعہ ممکنہ طور پر امریکی پیٹریاٹ دفاعی نظام میں خرابی کے باعث پیش آیا، تاہم واقعے کی مزید تحقیقات جاری ہیں۔
دوسری جانب ایران کی پاسدارانِ انقلاب نے حملے میں کسی بھی قسم کے ملوث ہونے کی سختی سے تردید کی ہے۔ ایرانی حکام کا کہنا ہے کہ کویت ایئرپورٹ پر ہونے والے واقعے سے ان کا کوئی تعلق نہیں اور اس حوالے سے لگائے گئے الزامات بے بنیاد ہیں۔
کویتی حکام نے واقعے کے تمام پہلوؤں کا جائزہ لینے اور ذمہ دار عناصر کا تعین کرنے کے لیے تحقیقات کا دائرہ مزید وسیع کرنے کا اعلان کیا ہے۔
