لوئر دیر: دانوہ کے پہاڑی سلسلوں میں لگی آگ تاحال بے قابو ہے، جس پر قابو پانے کے لیے ریسکیو 1122 کی ٹیمیں مسلسل امدادی کارروائیوں میں مصروف ہیں۔
ریسکیو اہلکاروں کے ساتھ سول ڈیفنس، محکمہ جنگلات کے عملے اور مقامی افراد بھی آگ بجھانے کی کوششوں میں حصہ لے رہے ہیں۔
ریسکیو ذرائع کے مطابق متاثرہ علاقے میں سڑکوں کی عدم موجودگی اور دشوار گزار پہاڑی راستوں کے باعث فائر وہیکلز کا جائے وقوعہ تک پہنچنا ممکن نہیں، جس سے آگ بجھانے کے عمل میں شدید مشکلات کا سامنا ہے۔
ذرائع کا کہنا ہے کہ تیز ہواؤں اور آگ کی شدت کے باعث شعلے مسلسل پھیل رہے ہیں، جس سے مزید علاقے متاثر ہونے کا خدشہ پیدا ہوگیا ہے۔
امدادی ٹیمیں محدود وسائل کے باوجود روایتی طریقوں سے آگ پر قابو پانے کے لیے بھرپور کوششیں جاری رکھے ہوئے ہیں۔ حکام نے صورتحال پر گہری نظر رکھتے ہوئے متاثرہ علاقے میں امدادی سرگرمیاں تیز کر دی ہیں۔
