لکی مروت: دو افراد کے قتل کے خلاف جمعیت علماء اسلام (جے یو آئی) کا احتجاج تاجہ زئی چوک پر بدستور جاری ہے، جس کے باعث انڈس ہائی وے گزشتہ تین گھنٹوں سے ہر قسم کی ٹریفک کے لیے بند ہے۔
احتجاج کے نتیجے میں شاہراہ پر گاڑیوں کی لمبی قطاریں لگ گئی ہیں جبکہ شدید گرمی کے باوجود ہزاروں افراد دھرنے میں شریک ہیں۔ احتجاج کی قیادت جے یو آئی سربراہ مولانا فضل الرحمان کے فرزند مولانا اسجد محمود کر رہے ہیں۔
مظاہرین نے مقتولین گل زرین اور مطیع اللہ کی نماز جنازہ بھی سڑک پر ادا کی، جبکہ دونوں افراد کی لاشیں تاحال احتجاجی مقام پر موجود ہیں۔ شرکاء کا کہنا ہے کہ جب تک دونوں مقتولین کے قاتلوں کو گرفتار نہیں کیا جاتا، احتجاج ختم نہیں کیا جائے گا۔
مظاہرین کے مطابق گل زرین، جو ایک ٹھیکیدار تھے، اور مطیع اللہ کو گزشتہ روز عصر کے وقت مسلح افراد نے ان کے گھروں سے اغوا کیا تھا، جنہیں بعد ازاں قتل کردیا گیا۔ واقعے کے خلاف علاقے میں شدید غم و غصہ پایا جاتا ہے۔
احتجاجی قیادت نے حکومت اور قانون نافذ کرنے والے اداروں سے مطالبہ کیا ہے کہ واقعے میں ملوث عناصر کو فوری طور پر گرفتار کرکے انصاف فراہم کیا جائے۔
