اسلام آباد: کراچی میں دہشت گرد حملے میں افغان شہریوں کے ملوث ہونے کے شواہد سامنے آنے پر پاکستان نے افغانستان سے شدید احتجاج کیا ہے۔
افغان ناظم الامور کو دفتر خارجہ طلب کیا گیا، جبکہ کابل میں بھی افغان وزارت خارجہ کو احتجاجی مراسلہ دے دیا گیا۔
ترجمان دفتر خارجہ کے مطابق کراچی میں ہونے والے دہشت گرد حملے پر پاکستان نے افغانستان کے سامنے باضابطہ اور شدید احتجاج ریکارڈ کرایا ہے۔
افغان ناظم الامور کو گزشتہ رات وزارت خارجہ طلب کرکے احتجاجی مراسلہ دیا گیا.
کابل میں پاکستان کے سفیر عبیدالرحمن نظامانی نے بھی افغان وزارت خارجہ کے سامنے اسی نوعیت کا احتجاج ریکارڈ کرایا۔
ترجمان نے کہا کہ کراچی حملے میں افغان شہریوں کے ملوث ہونے کے شواہد موجود ہیں اور ایک افغان دہشت گرد کو زندہ گرفتار بھی کیا گیا ہے۔
ان کا کہنا تھا کہ یہ اس بات کا واضح ثبوت ہے کہ افغان سرزمین اور افغان شہری پاکستان کے اندر دہشت گرد حملوں کی منصوبہ بندی اور ان پر عمل درآمد کے لیے استعمال ہو رہے ہیں۔
