وفاقی حکومت نے ملک بھر میں غیرقانونی طور پر مقیم افغان شہریوں کی گرفتاری کا فیصلہ کرلیا، اس حوالے سے وفاقی حکومت کے فیصلے پر عمل درآمد کےلیے چیف کمشنر اسلام آباد کو بھی خط لکھا گیا ہے ۔
اسلام آباد: وفاقی وزارت داخلہ نے چاروں صوبوں کے چیف سکریٹریز، چیف سیکرٹری گلگت بلتستان اور چیف سیکرٹری آزاد کشمیرکو خط لکھ دیا ۔
خط میں کہا گیا ہے کہ ویزا کے بغیر مقیم کسی بھی افغان شہری کو 10 جولائی سے گرفتار کیا جائےگا، خط میں یہ کہا گیا ہے کہ افغان شہریوں بشمول ویزا، عدالتوں میں زیر سماعت کیسز اور ڈی پورٹیشن میں تیزی لائی جائے اور تمام ڈپٹی کمشنرز، پولیس، قانون نافذکرنے والے اداروں کو ضروری ہدایات جاری کی جائیں ۔
خط میں ہدایت کی گئی ہے کہ روزانہ کی بنیاد پر 11جولائی سے وزارت داخلہ کو رپورٹ بھیجی جائے جس میں بغیر ویزے کے پکڑے گئے افغان شہریوں کی تعداد بتائی جائے جبکہ رپورٹ میں کی گئی کارروائی اور ان کی موجودہ حیثیت بھی شامل ہو ۔
وزارت داخلہ کے خط میں صوبوں کے چیف سیکریٹریز کو ہدایت کی گئی ہے کہ کہ فیصلوں پر سختی سے عملدرآمد یقینی بنایا جائے ۔
