ملک بھر میں پاکستان کا 79واں یومِ آزادی آج ملی جوش و جذبے کے ساتھ منایا جا رہا ہے۔ دن کا آغاز توپوں کی سلامی اور نمازِ فجر میں ملکی ترقی، یکجہتی، امن اور خوشحالی کے لیے خصوصی دعاؤں سے ہوا۔
رات 12 بجتے ہی ملک کے مختلف شہروں میں جشنِ آزادی کا آغاز ہوگیا۔ گلیاں، محلے اور بازار سبز ہلالی پرچموں سے سج گئے، جبکہ شہریوں نے بڑی تعداد میں گھروں سے باہر نکل کر آزادی کی خوشیاں منائیں۔
کراچی، لاہور، اسلام آباد، پشاور، کوئٹہ اور ملتان سمیت مختلف شہروں میں چراغاں اور آتش بازی کے شاندار مظاہرے کیے گئے۔ کئی مقامات پر جشنِ آزادی کی ریلیاں بھی نکالی گئیں۔
لاہور میں گریٹر اقبال پارک اور لبرٹی چوک پر آتش بازی کا شاندار مظاہرہ کیا گیا۔ بڑی تعداد میں شہری جشنِ آزادی منانے اور آتش بازی دیکھنے کے لیے جمع ہوئے۔
حیدرآباد میں بھی رات 12 بجتے ہی مختلف مقامات پر آتش بازی کی گئی۔ شہری بڑی تعداد میں سڑکوں پر نکل آئے اور جشنِ آزادی بھرپور انداز میں منایا۔
ملتان میں ضلعی انتظامیہ کی جانب سے گھنٹہ گھر چوک پر آتش بازی کا اہتمام کیا گیا۔ جشنِ آزادی کی خوشیاں منانے کے لیے شہریوں کی بڑی تعداد گھنٹہ گھر چوک پہنچ گئی۔
یومِ آزادی کے آغاز پر پاک فوج کی 21 توپوں کی سلامی
یومِ آزادی کے آغاز پر لاہور میں پاک فوج کی جانب سے 21 توپوں کی سلامی دی گئی۔ نمازِ فجر کے اجتماعات میں پاکستان کی ترقی، امن، سلامتی، یکجہتی اور خوشحالی کے لیے خصوصی دعائیں بھی کی گئیں۔
کوئٹہ میں بھی کینٹ کے علاقے میں دن کے آغاز پر 21 توپوں کی سلامی دی گئی۔ مساجد میں نمازِ فجر کے دوران ملک کی سلامتی اور استحکام کے لیے خصوصی دعائیں کی گئیں۔
مسلح افواج کی قوم کو جشنِ آزادی کی مبارکباد
پاک فوج کے شعبہ تعلقاتِ عامہ (آئی ایس پی آر) کے مطابق چیف آف آرمی اسٹاف و چیف آف ڈیفنس فورسز فیلڈ مارشل، نیول چیف اور ایئر چیف نے قوم کو 79ویں جشنِ آزادی پر مبارکباد پیش کی۔
آئی ایس پی آر کے مطابق مسلح افواج تمام خطرات کے مقابلے میں مادرِ وطن کے دفاع کے لیے غیر متزلزل عزم پر قائم ہیں۔ پاکستان کی خودمختاری اور علاقائی سالمیت کے محافظ کی حیثیت سے مسلح افواج نے ملک کے دفاع کے عزم کا اعادہ کیا ہے۔
آئی ایس پی آر کا کہنا ہے کہ بانیانِ پاکستان کا وژن اور ان کے اصول قوم کو ملکی نظریات اور اقدار کی پاسداری کے لیے مسلسل رہنمائی فراہم کرتے ہیں۔
بیان میں کہا گیا ہے کہ مسلح افواج قوم کے ساتھ متحد ہو کر پاکستان میں امن، استحکام اور خوشحالی کے تحفظ کے لیے اپنا کردار جاری رکھیں گی۔
