مردان میں ایک پولیس اہلکار نے ہتھکڑیوں میں بند ملزم کو فائرنگ کر کے قتل کر دیا، فائرنگ کا یہ واقعہ صدر تھانے، ایس پی صدر سرکل اور ایس پی انویسٹی گیشن آفس کے اندر پیش آیا، پولیس نے موقع پر ہی فائرنگ کرنے والے اہلکار کو گرفتار کر لیا، جبکہ ڈی پی او مردان نے غفلت برتنے پر تین پولیس اہلکاروں کو معطل کر دیا ہے اور واقعے کی مزید تفتیش جاری ہے ۔
مردان پولیس کے صدر تھانے ایس پی انویسٹی گیشن آفس اور سرکل ایس پی صدر آفس کے اندر عمران نامی شخص جو ڈی ایس پی ٹریفک کے نائب ریڈر کے طور پر ڈیوٹی انجام دے رہا تھا، نے ہتھکڑیوں میں بند ملزم مشال پر پولیس کی موجودگی میں فائرنگ کی جس کے نتیجے میں وہ موقع پر ہی جاں بحق ہو گیا ۔
موقع پر ڈیوٹی پر موجود پولیس نے ملزم پولیس اہلکار عمران کو ہتھیار سمیت حق میں لے لیا اور فوری طور پر پولیس حکام موقع پر پہنچ گئے اور واقعے کی تحقیقات شروع کر دیں ۔
ڈی پی او مردان نے غفلت برتنے پر تین پولیس اہلکاروں کو معطل کر کے ان کے خلاف محکمانہ کارروائی کا حکم بھی دے دیا ہے ۔
دوسری طرف جاں بحق ہونے والے شخص کے ورثا نے اس کی لاش کو احتجاجاً صدر تھانے کے سامنے رکھ دیا اور روڈ کو بھی ہر قسم کی ٹریفک کے لیے بند کر دیا ۔
موقع پر ایس پی سٹی اور ایس پی صدر سرکل نے مظاہرین سے مذاکرات بھی کیے، مظاہرین کا کہنا تھا کہ پولیس کی موجودگی میں ملزم کا قتل ہونا پولیس کی بڑی لاپرواہی اور غفلت ہے ۔
واضح رہے کہ گزشتہ شب جاں بحق ہونے والے ملزم نے پولیس والے کے بھائی کو معمولی بات پر قتل کیا تھا، جس کے تناظر میں مقتول کے بھائی پولیس اہلکار نے بدلہ لیا ۔
