وزیراعظم شہباز شریف نے نرس رضیہ نورین کو پمز ہسپتال آتشزدگی کے واقعے کے دوران نومولود کی جان بچانے پر ایک کروڑ روپے کا چیک دیا اور سر پر ہاتھ رکھ کر ان کی ہمت و بہادری کو سراہا ۔
اسلام آباد: وزیراعظم شہباز شریف نے پمز ہسپتال میں آتشزدگی کے دوران جان پر کھیل کر نومولود کو بچانے والی نرس رضیہ نورین سے وزیراعظم ہاؤس میں ملاقات کی ۔
وزیراعظم شہباز شریف نے کہا کہ پوری قوم کو نرس رضیہ نورین پر فخر ہے، قوم ان کی ہمت اور بہادری کی معترف ہے، قوم کی بیٹی رضیہ نورین کا کارنامہ سنہری حروف میں یاد رکھا جائے گا اور پوری قوم انہیں خراج تحسین پیش کرتی ہے ۔
وزیراعظم نے اعلان کیا کہ 23 مارچ کو نرس رضیہ نورین کو تمغۂ خدمت سے بھی نوازا جائے گا،ملاقات کے دوران نرس رضیہ نورین نے بتایا کہ آگ تیزی سے پھیل رہی تھی، لیکن انہوں نے کچھ نہیں سوچا اور بچوں کو بچانے کیلئے اندر چلی گئیں، ان کا کہنا تھا کہ بچہ بہت چھوٹا تھا، اسے ریسکیو کرکے باہر لے آئی ۔
رضیہ نورین کے مطابق جب وہ دوسرے بچوں کو بچانے کیلئے دوبارہ اندر گئیں تو دھماکا ہوا اور اندھیرا چھا گیا۔ انہوں نے دوسری نرس سے کہا کہ بچوں کو بچائیں ۔
نرس رضیہ نورین نے وزیراعظم سے گفتگو میں کہا کہ انہوں نے صرف اپنی ذمہ داری نبھائی، تاہم وزیراعظم کی جانب سے عزت افزائی پر وہ بہت خوش ہیں ۔
