اپر سوات کے علاقے مدین میں انتہائی دلخراش واقعہ پیش آیا ہے، جہاں 9 سالہ بچی کو جنسی زیادتی کا نشانہ بنانے کے بعد سر میں گولی مار کر قتل کر دیا گیا، اس دردناک واقعے کے بعد پوری وادی میں شدید غم وغصے اور تشویش کی لہر دوڑ گئی ہے ۔
تفصیلات کے مطابق جاں بحق ہونے والی 9 سالہ بچی (مرحوم جمال الدین کی بیٹی) کو زیادتی کا نشانہ بنانے کے بعد سر میں گولی ماری گئی، جس سے وہ شدید زخمی ہوئی اور زخموں کی تاب نہ لاتے ہوئے دم توڑ گئی ۔
واقعے کی اطلاع ملتے ہی مدین پولیس نے موقع پر پہنچ کر بچی کو سول ہسپتال مدین منتقل کیا، جہاں پوسٹ مارٹم اور دیگر طبی قانونی کارروائی مکمل کرنے کے بعد لاش ورثا کے حوالے کر دی گئی ۔
پولیس نے فوری کارروائی کرتے ہوئے قتل کے شائبے میں ایک مشتبہ شخص کو گرفتار کر لیا ہے، پولیس حکام کا کہنا ہے کہ ملزم سے تفتیش جاری ہے اور واقعے کے تمام پہلوؤں کا جائزہ لے کر انصاف کے تقاضے پورے کیے جائیں گے ۔
