پاکستانی سینئر اداکارہ ریشم نے شکوہ کردیا کہ لوگ ان کے اچھی نیت سے کیے گئے کاموں پر بھی ان کو تنقید کا نشانہ بناتے ہیں۔
اداکارہ ریشم کی ایک ویڈیو سوشل میڈیا پر وائرل ہوئی جس میں وہ لنگر کی دیگ پکاتے ہوئے دیکھائی دے رہی ہیں۔اس ویڈیو میں انہوں نے کہا کہ گزشتہ 20 سالوں سے میں اپنے ہاتھوں سے لنگر بنا کر بانٹ رہی ہوں اور یہ سلسلہ گزشتہ 6 برسوں سے مسلسل 12 مہینے تک چلتا آ رہا ہے۔ریشم کے مطابق پہلے جو ایک دیگ اور روٹیوں 50 ہزار میں بنتی تھیں اب وہی لنگر ڈیڑھ لاکھ روپے میں تیار ہوتا ہے اور ان کے لنگر میں تین گنا تک زیادہ اضافہ بھی ہو گیا ہے۔
ریشم نے کہا کہ مجھے شوبز فلموں کا کام چھوڑے ہوئے تقریبا 15 سال گزر گئے ہیں،اب میں کبھی ماڈلنگ یا پھرکبھی کچھ شوز میں شرکت کرتی ہوں،اس سے جو آمدنی میرے پاس آتی ہے اسی سے لنگر کا سلسلہ جاری ہے۔اداکارہ ریشم کے مطابق میں نے اللّٰہ پاک سے وعدہ کیا ہوا ہے کہ جب تک میں زندہ ہوں تب تک لنگر بانٹتی رہوں گی۔
ریشم نے کہا ہے کہ لوگ میرے اس کام پر سوال اٹھاتے ہیں اور کہتے ہیں کہ میں یہ سب کچھ غلط کر رہی ہوں اس کے بجائے مجھے لوگوں کو روزگار فراہم کرنا چاہے۔اداکارہ کے مطابق میں کون ہوتی ہوں کسی کو کھانا کھلانے والی، رب کی ذات کھلانے والی ہے، میرے پاس دنیا بھر میں صرف ایک ہی گھر ہے، اگر میں نے یہ بیچ کر لوگوں کو روزگار دے دیا تو میں خود کیا کسی جھگی میں رہوں گی۔اداکارہ ریشم نے کہا کہ میں یہ کام صرف اللّٰہ کی رضا اور خوشنودی کے لیے کرتی ہوں، لوگوں کے مطابق میں حرام کمائی سے لنگر بناتی ہوں،جبکہ اس کا فیصلہ اللّٰہ کو کرنا ہے۔
