پشاور: خیبرپختونخوا، بالخصوص پشاور میں غیر قانونی طور پر مقیم افغان مہاجرین کی وطن واپسی کا عمل عیدالاضحیٰ کے بعد تاحال دوبارہ شروع نہیں ہو سکا، جس پر شہریوں نے تشویش کا اظہار کیا ہے۔
یاد رہے کہ عیدالاضحیٰ سے قبل انسانی ہمدردی کی بنیاد پر افغان مہاجرین کی واپسی کا عمل عارضی طور پر معطل کر دیا گیا تھا۔ تاہم عید کی تعطیلات ختم ہونے کے باوجود اس عمل کی بحالی کے حوالے سے کوئی پیش رفت سامنے نہیں آ سکی۔
مقامی ذرائع کے مطابق پشاور کے مختلف علاقوں، جن میں بورڈ بازار، راحت آباد، تاج آباد، سفید ڈھیری، اچینی بالا، اچینی پایان، زنگلی، سربند اور دوران پور شامل ہیں، میں بڑی تعداد میں افغان باشندے بدستور مقیم ہیں۔
شہریوں کا کہنا ہے کہ حکومت کی جانب سے اعلان کردہ پالیسی پر مؤثر عمل درآمد یقینی بنایا جانا چاہیے اور اس حوالے سے واضح حکمت عملی سامنے لائی جانی چاہیے تاکہ عوامی خدشات کا ازالہ ہو سکے۔
