اسلام آباد: وفاقی وزیر اقتصادی امور احد چیمہ سے ورلڈ بینک کی کنٹری ڈائریکٹر بولورما امگابازار نے ملاقات کی۔
ترجمان اقتصادی امور کے مطابق ملاقات میں کنٹری پارٹنرشپ فریم ورک سے متعلق اہم امور پر تبادلہ خیال کیا گیا۔
احد چیمہ نے کہا کہ سی پی ایف پر عملدرآمد اور اس کے اہداف کے حصول کے لیے وفاقی حکومت اور تمام صوبائی حکومتیں آن بورڈ ہیں۔
انہوں نے کہا کہ حکومت اصلاحات کے تسلسل اور ادارہ جاتی صلاحیت کو مضبوط بنانے کے لیے پرعزم ہے۔
ترجمان اقتصادی امور کے مطابق اجلاس میں بچوں میں غذائی قلت کے خاتمے کے لیے پروگراموں پر بھی تبادلہ خیال کیا گیا۔
احد چیمہ نے کہا کہ عالمی بینک کے تعاون سے سیلاب اور دیگر موسمیاتی خطرات کے اثرات کو کم کرنے کے لیے کام کیا جا رہا ہے.
جب کہ صاف اور پائیدار توانائی کے نظام کی جانب منتقلی کے لیے اقدامات کا سلسلہ بھی جاری ہے۔
ترجمان کے مطابق ورلڈ بینک کی کنٹری ڈائریکٹر بولورما امگابازار نے معیشت کو مستحکم کرنے کے لیے حکومت کی جاری کوششوں کو سراہا.
بولورما امگابازار نے کہا کہ پاکستان کی طویل مدتی ترقی کے اہداف کے حصول کے لیے ورلڈ بینک تعاون جاری رکھے گا۔
ملاقات میں نجی شعبے کی پیداواری اور شمولیتی سرمایہ کاری کو فروغ دینے سے متعلق امور پر بھی گفتگو ہوئی۔
