اے این ایف ہیڈ کوارٹرز کے ترجمان کےمطابق انسداد منشیات فورس (اے این ایف) نے ملک بھر میں 10 کارروائیوں کے دوران 340 ملین روپے مالیت کی 373 کلو گرام منشیات برآمد اور 10 ملزمان کو گرفتار کرلیا ہے۔
ذرائع کے مطابق لاہور ایئرپورٹ پر جدہ جانے والے مسافر سے 783 گرام آئس برآمد ہوئی ہے۔جبکہ کراچی میں کورئیر آفس میں آسٹریلیا کے لیے بک کیے گئے پارسل سے 1.140 کلو آئس اور 50 گرام ہیروئن برآمد ہوئی۔
دوسری کارروائی میں چمن کے علاقے سے 190 کلو ہیروئن برآمد کر لی گئی۔ پسنی اور گوادر کے علاقوں سے 100 کلو چرس اور 22 کلو افیون برآمد کر لی گئی۔ M-1 موٹروے اسلام آباد پر روکے گئے ایک گاڑی سے 31.2 کلو گرام چرس اور 1.2 کلوگرام افیون برآمد کر کے کارروائی کے دوران ایک ملزم کو گرفتار کر لیا گیا۔
کوئٹہ میں ریسٹورنٹ کے قریب سے 2 ملزمان سے 12 کلو گرام چرس برآمد کر لی گئی۔ پشاور روڈ راولپنڈی سے گرفتار ملزم کے قبضے سے 6 کلو چرس برآمد کر لی گئی۔
آر سی ڈی روڈ حب میں تین ملزمان سے چھ کلو چرس برآمد کر لی گئی۔ لاہور میں یونیورسٹی کے قریب پکڑے گئے دو ملزمان سے 2.6 کلو گرام چرس اور 260 گرام افیون برآمد کر لی گئی۔ گرفتار ملزمان کے خلاف انسداد منشیات ایکٹ کے تحت مقدمات درج کر کے مزید تفتیش جاری ہے۔
