اسلام آباد: وزیراعظم شہباز شریف نے سیکرٹری خارجہ آمنہ بلوچ اور اقوام متحدہ میں پاکستان کے مستقل مندوب عاصم افتخار احمد کی نئی تقرریوں کی منظوری دے دی۔
نائب وزیراعظم اور وزیر خارجہ اسحاق ڈار کے مطابق اقوام متحدہ میں پاکستان کے مستقل مندوب عاصم افتخار احمد نئے سیکرٹری خارجہ کی ذمہ داریاں سنبھالیں گے۔
اسحاق ڈار نے کہا کہ عاصم افتخار احمد کی قیادت میں دفتر خارجہ پاکستان کے قومی مفادات کو پیشہ ورانہ انداز میں آگے بڑھانے کا سلسلہ جاری رکھے گا۔
نائب وزیراعظم کے مطابق آمنہ بلوچ نے 11 ستمبر 2024 کو سیکرٹری خارجہ کا منصب سنبھالا تھا اور وہ 17 ستمبر 2026 کو سرکاری ملازمت سے ریٹائر ہوجائیں گی۔
ریٹائرمنٹ کے بعد آمنہ بلوچ ترکیے میں پاکستان کی سفیر کی حیثیت سے اپنی نئی ذمہ داریاں سنبھالیں گی۔
