کوہاٹ کے علاقے لاچی تحصیل شکردرہ روڈ پر نامعلوم دہشت گردوں نے پولیس موبائل گاڑی پر حملہ کیا، جس کے نتیجے میں ڈی ایس پی اسد محمود بشمول چھ پولیس اہلکار شہید اور تین دیگر اہلکار زخمی ہوئے ہیں۔
ڈسٹرکٹ پولیس آفیسر کوہاٹ شہباز الٰہی نے بتایا کہ شہید ہونے والوں میں ڈی ایس پی اسد محمود، ایک اے ایس آئی، محافظ اور ڈرائیور شامل ہیں۔ زخمی اہلکاروں کو فوری طور پر قریبی اسپتال منتقل کیا گیا جہاں انہیں طبی امداد دی جا رہی ہے۔
ڈی پی او نے مزید کہا کہ واقعے کے بعد سیکیورٹی ہائی الرٹ کر دی گئی ہے، پولیس کی بھاری نفری علاقے میں پہنچ گئی اور علاقہ گھیرے میں لے کر سرچ آپریشن جاری ہے۔ ناکہ بندی سخت کر دی گئی ہے تاکہ حملہ آوروں کو جلد گرفتار کیا جا سکے۔
شہباز الٰہی نے اس واقعے کو بزدلانہ حملہ قرار دیتے ہوئے کہا کہ یہ پولیس کے مورال کو متاثر نہیں کرے گا اور ملوث دہشت گردوں کو جلد انصاف کے کٹہرے میں لایا جائے گا۔
