شمالی پاکستان میں واقع براڈ پیک کی چوٹی سر کرنے کی مہم کے دوران برفانی تودہ گرنے سے متعدد کوہ پیما لاپتا ہو گئے، جبکہ امدادی ٹیموں نے اب تک چار افراد کی لاشیں نکال لی ہیں۔
الپائن کلب آف پاکستان کے مطابق یہ افسوسناک واقعہ جمعرات کی دوپہر تقریباً دو بجے پیش آیا، جب کوہ پیماؤں کا ایک بین الاقوامی گروپ براڈ پیک کی جانب پیش قدمی کر رہا تھا۔ حادثے کے بعد گروپ سے رابطہ مکمل طور پر منقطع ہو گیا۔
الپائن کلب کا کہنا ہے کہ کم از کم دس کوہ پیما لاپتا ہیں، جن میں پاکستانی کوہ پیما سہیل سخی بھی شامل ہیں۔ لاپتا افراد میں نیپال، امریکہ، چین اور دیگر ممالک کے کوہ پیما بھی شامل ہیں۔
اطلاعات کے مطابق نیپالی ٹیم کی قیادت معروف کوہ پیما نرمَل پورجا (نِمز دائی) کر رہے تھے۔ امدادی حکام کے مطابق خراب موسمی حالات کے باوجود لاپتا کوہ پیماؤں کی تلاش کے لیے ریسکیو آپریشن جاری ہے۔
