پاکستانی معیشت کے لیے بڑی اور اچھی خبر سامنے آگئی، پاکستان کے لیےعالمی بینک نے بڑا اعلان کردیا۔
ذرائع کے مطابق پاکستان کے لیے عالمی بینک نے ایک ارب ڈالر کی منظوری دے دی ہے، یہ رقم داسو ڈیم کی تعمیر کے لیے فراہم کی جائے گی۔ورلڈ بینک کے مطابق داسو ہائیڈرو منصوبہ پاکستان کے لئے مکمل گیم چینجر ثابت ہوگا، داسوہائیڈرو منصوبے کے باعث پاکستان میں سستی بجلی پیدا ہوسکے گی۔یہ منصوبہ مکمل ہونے پر 4320 سے 5400 میگا واٹ تک بجلی پیدا کی جاسکے گی، اس منصوبے کے پہلےمرحلے میں بجلی کا پیداواری تخمینہ 2160 میگا واٹ کے قریب ہوگا۔
جبکہ اس سے پہلے ورلڈ بینک ابتدائی کاموں کیلیے 588.4 ملین ڈالر اور ٹرانسمیشن لائنوں کی تنصیب کیلیے 700 ملین ڈالر کی منظوری دے چکا ہے۔یاد رہے کہ پاکستان کو توانائی کے شدید بحران کا سامنا کرنا پڑ رہا ہے، جس کے باعث گھریلوں صارفین سمیت فیکٹریز، مساجد اور اسپتال وغیرہ نے سولر سسٹم کو لگانا شروع کردیا ہے، جس کی وجہ سے باقی بچ جانے والے صارفین پر بوجھ مزید بڑھ جائے گا۔
ورلڈ بینک کے نئے تخمینے کے مطابق منصوبے کی لاگت 13 فیصد اضافے کے ساتھ 4.3 ارب ڈالر سے بڑھ کر 4.9 ارب ڈالر تک ہوگئی ہے،جبکہ اس منصوبے کو پورا کرنے کا پہلا ہدف دسمبر 2021 مقرر کیا گیا تھا۔اس کے برعکس نواز شریف حکومت نے 2013 میں دیامیر بھاشا ڈیم پر داسو ہائیڈرو پاور پراجیکٹ کو ترجیح دی تھی، اور نواز شریف 2018 سے پہلے اس کے پہلے مرحلے کا افتتاح کرنے کے خواہش مند تھے، لیکن یہ منصوبہ تعطل کا شکار ہوتا گیا، تاہم ورلڈ بینک نے اب اس کی تکمیل کی مدت 2028 مقرر قرار دی ہے۔
