بلوچستان کے ضلع کچھی کے علاقے مچھ میں سکیورٹی فورسز کی گاڑی پر دیسی ساختہ بم حملہ ہوا ہے جس میں 7 فوجی اہلکار شہید ہو گئے ۔
آئی ایس پی آر کی جانب سے جاری بیان کے مطابق بھارتی پراکسی، نام نہاد ’بلوچ لبریشن آرمی‘ سے تعلق رکھنے والے دہشت گردوں نے سکیورٹی فورسز کی گاڑی کو دیسی ساختہ بم سے نشانہ بنایا ۔
بم حملے میں پاک فوج کے 7 اہلکار شہید ہو گئے، جن میں کراچی کے رہائشی 42 سال کے صوبیدار عمر فاروق عمر ، ضلع کرک کے رہائشی 28 سالہ نائیک آصف خان ،ضلع اورکزئی کے رہائشی 28 سالہ نائیک مشکور علی عمر ، ضلع لکی مروت کے رہائشی 26 سال کے سپاہی طارق نواز عمر شامل ہیں ۔
پاک فوج کے شعبہ تعلقات عامہ کے مطابق شہدا میں ضلع لکی مروت کے رہائشی 28 سال عمر کے سپاہی واجد احمد فیض ، ضلع کرک کے رہائشی 22 سالہ سپاہی محمد عاصم اور ضلع کوہاٹ کے 28 سال کی عمر کے سپاہی محمد کاشف خان شامل ہیں ۔
آئی ایس پی آر کے مطابق علاقے میں موجود کسی بھی دہشت گرد کے خاتمے کے لیے آپریشن جاری ہے، اس گھناؤنے اور بزدلانہ فعل کے مرتکب افراد کو انصاف کے کٹہرے میں لایا جائے گا ۔
ٓآئی ایس پی آر کا مزید کہنا تھا کہ پاکستان کی سکیورٹی فورسز قوم کے شانہ بشانہ بلوچستان کے امن، استحکام اور ترقی کو سبوتاژ کرنے کی کوششوں کو ناکام بنانے کے لیے پُرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں ۔
آئی ایس پی آر کا بتانا تھا کہ پاکستانی سرزمین پر کام کرنے والے بھارت اور اس کے پراکسیز کے مذموم عزائم کو بہادر سکیورٹی فورسز، ایل ای اے اور پاکستان کی بہادر قوم انشااللہ شکست دے گی ۔
