چارسدہ میں پولیس اور سی ٹی ڈی کی کامیاب مشترکہ کارروائی میں پولیس اہلکار فاروق کو شہید کرنے والے دو ٹارگٹ کلرز کو ہلاک کردیا گیا ، ملزمان کے قبضے سے دو عدد پستول اور ایک موٹر سائیکل برآمد کر لی گئی ۔
چارسدہ: سٹی پولیس اور سی ٹی ڈی مردان ریجن نے مشترکہ کارروائی کے دوران غنی خان روڈ پر پولیس اہلکار کو شہید کرنے والے مطلوب ٹارگٹ کلرز کو پولیس مقابلے میں ہلاک کر دیا ۔
پولیس کو اطلاع موصول ہوئی تھی کہ دہشت گردی، قتل اور اقدام قتل کے مقدمات میں مطلوب مجرمان اشتہاری اسماعیل اور حمزہ اپنے رشتہ داروں کے گھر آئے ہوئے ہیں اور کسی بھی وقت دہشت گردانہ کارروائی کا منصوبہ رکھتے ہیں ۔
پولیس نے فوری طور پر سی ٹی ڈی کے ہمراہ علاقے ڈھب بانڈہ میں ناکہ بندی کی، اسی دوران دو مشکوک موٹر سائیکل سواروں کو روکنے کی کوشش کی گئی، جنہوں نے پولیس کو دیکھتے ہی فائرنگ شروع کر دی، پولیس نے بھی اپنی حفاظت کے پیش نظر جوابی فائرنگ کی، جس کے نتیجے میں دونوں حملہ آور موقع پر ہلاک ہو گئے ۔
ہلاک ملزمان کے قبضے سے دو عدد پستول اور ایک موٹر سائیکل برآمد کر لی گئی، ابتدائی شناخت کے مطابق دونوں ہلاک شدگان نے 30 اپریل کو غنی خان روڈ پر ڈیوٹی پر جاتے ہوئے پولیس اہلکار فاروق پر حملہ کر کے شہید کیا تھا، جب کہ ساتھ موجود محکمہ صحت کا ملازم زخمی ہوا تھا ۔
