پشاور( تحسین اللہ تاثیر) وزیراعلیٰ خیبر پختونخوا علی امین گنڈا پور کی سربراہی میں محکمہ تعلیم کا اجلاس ہوا، اجلاس میں سرکاری پرائمری سکولوں میں ”سکول کھانہ پروگرام”شروع کرنے کا اصولی فیصلہ کیا گیا ہے۔
پروگرام کے تحت کم و بیش 70 ہزار بچوں کو روزانہ مفت اور معیاری کھانا فراہم کرنے کی تجویز ہے،اس پر سالانہ 50 کروڑ روپے کا تخمینہ لگایا گیا ہے جو صوبائی حکومت ادا کرے گی۔ابتدائی طور پر پروگرام کے پائلٹ پراجیکٹ کا آغاز ایبٹ آباد اور سوات سے کیا جائے گا،بعد میں اس منصوبے کو خیبرپختونخوا کے دیگر ڈویژنل ہیڈکوارٹرز میں بھی شروع کیا جائے گا۔
پروگرام پر عملدرآمد کے سلسلے میں پیشرفت کے لئے محکمہ تعلیم اور سماجی بہبود کے حکام پر مشتمل کمیٹی بنانے کا فیصلہ کیا گیا ہے، کمیٹی تمام جزئیات کو حتمی شکل دے کر حتمی منظوری کے لئے صوبائی کابینہ کو پیش کرے گی۔وزیراعلیٰ خیبر پختونخوا کا کہنا تھا کہ یہ پروگرام موجود حکومت کا ایک اور اہم فلاحی اقدام ہے جس کے تحت سرکاری سکولوں کے بچوں کو مفت اور معیاری کھانا فراہم کیا جائے گا۔اس اقدام سے سرکاری سکولوں میں انرولمنٹ کو بڑھانے میں بھی مدد ملے گی اور صوبائی حکومت اس مقصد کے لئے ترجیحی بنیادوں پر فنڈز فراہم کرے گی۔
