وزیراعظم شہباز شریف سے متحدہ عرب امارات کی ٹیلی کمیونیکیشن کمپنی کے وفد نے ملاقات کی، وزیراعظم نے پاکستانی معیشت کے مختلف سیکٹرز میں مزید سرمایہ کاری کرنےکی دعوت دیتے ہوئے کہا کہ بیرونی کمپنیوں کوکاروبار دوست ماحول اور سرمایہ کاری کے مزید مواقع فراہم کرنا ترجیح ہے ۔
اسلام آباد: وزیراعظم شہبازشریف نے یو اے ای کے وفد سے گفتگو کرتے ہوئے کہا کہ حکومت سرمایہ کاری کے سلسلے میں تمام تر سہولیات فراہم کرے گی، متحدہ عرب امارات اور پاکستان کے مشترکہ ثقافت، بھائی چارے اور مذہبی اقدارپر مبنی دیرینہ تعلقات ہیں ۔
وزیراعظم کا کہنا تھا کہ اماراتی کمپنیاں پاکستانی معیشت میں عرصہ دراز سے سرمایہ کاری کر رہی ہیں، بیرونی کمپنیوں کوکاروبار دوست ماحول اور سرمایہ کاری کے مزید مواقع فراہم کرنا ترجیح ہے ۔
اس موقع پر گروپ سی ای او اماراتی کمپنی کا کہنا تھا کہ ان کی کمپنی پاکستان میں گزشتہ 19سال سےکامیاب سرمایہ کاری کررہی ہے، پاکستان میں مزید کاروبار اور سرمایہ کاری کرنے کے خواہاں ہیں ۔
اماراتی وفد کا کہنا تھا کہ ہماری کمپنی میں 10ہزار سے زائد پاکستانی قابل قدر خدمات سر انجام دے رہے ہیں، پاکستان میں مستقبل کے لیے طویل مدتی اور کامیاب سرمایہ کاری کے لیے پر عزم ہیں ۔
نائب وزیراعظم اور وزیرخارجہ اسحاق ڈار، وزیرخزانہ محمد اورنگزیب اور وزیر آئی ٹی شزا فاطمہ بھی اس موقع پر موجود تھے ۔
