نائب وزیرِ اعظم و وزیر خارجہ اسحاق ڈار کی زیرصدارت علاقائی و عالمی صورتِ حال پر اہم اجلاس

نائب وزیرِ اعظم و وزیرِ خارجہ سینیٹر محمد اسحاق ڈار کی زیرِ صدارت وزارتِ خارجہ میں ایک اہم اجلاس منعقد ہوا، جس میں سیکرٹری خارجہ آمنہ بلوچ اور وزارت کے سینئر حکام نے شرکت کی۔
ترجمان دفترخارجہ کے مطابق اجلاس میں بدلتی ہوئی علاقائی اور عالمی صورتحال کا تفصیلی جائزہ لیا گیا۔ اس موقع پر نائب وزیرِ اعظم و وزیرِ خارجہ نے خطے کو درپیش چیلنجز سے نمٹنے کے لیے مکالمے کی اہمیت پر زور دیا۔
سینیٹر محمد اسحاق ڈار نے ترجیحی امور پر متحرک اور مسلسل سفارتی روابط برقرار رکھنے کی ہدایت دیتے ہوئے کہا کہ موثر حکمت عملی کے ذریعے پاکستان اپنے قومی مفادات کا بہتر تحفظ یقینی بنا سکتا ہے۔