ڈی آئی خان: پاک فوج کے شعبہ تعلقات عامہ کی جانب سے جاری بیان میں کہا کہ سیکیورٹی فورسز نے علاقہ کلاچی میں دہشتگردوں کی موجودگی کی خفیہ اطلاع کی بنیاد پر کارروائی کی ہے ۔
آئی ایس پی آر نے کہا ہے کہ کارروائی کے دوران سیکیورٹی فورسز نے دہشتگردوں کے ٹھکانے کا گھیراؤ کیا اور مؤثر انداز میں کارروائی کی ،اس دوران آپریشن کے نتیجے میں تمام 10 دہشتگرد ہلاک ہوگئے ۔
آئی ایس پی آر نے مزید کہا ہے کہ دہشت گردوں سے شدید فائرنگ کے تبادلے میں پنجاب کے ضلع جہلم سے تعلق رکھنے والے 24 سالہ کیپٹن حسنین اختر نے اپنی ٹیم کی قیادت کرتے ہوئے مادرِ وطن پر قربان ہوئے اور شہادت کے عظیم رتبے پر فائز ہوگئے ۔
آئی ایس پی آر کے مطابق کیپٹن حسنین ایک نڈر اور بہادر افسر تھے، اپنے جرات مندانہ اور دلیرانہ فیصلوں کی وجہ سے جانے جاتے تھے اور کئی کامیاب آپریشنز میں نمایاں کارکردگی دکھا چکے تھے ۔
ہلاک دہشتگردوں کے قبضے سے بھاری مقدار میں اسلحہ اور گولہ بارود بھی برآمد کیا گیا، یہ دہشت گرد قانون نافذ کرنے والے اداروں پر حملوں اور معصوم شہریوں کی ٹارگٹ کلنگ میں ملوث تھے ۔
آئی ایس پی آر نے بتایا کہ علاقے میں موجود کسی بھی دیگر دہشتگردوں کے خاتمے کے لیے کلیئرنس آپریشن جاری ہے اور پاکستان کی مسلح افواج ملک سے دہشت گردی کے ناسور کو جڑ سے ختم کرنے کے لیے پرعزم ہیں ۔
