ڈیرہ اسماعیل خان پولیس پر فتنہ الخوارج کے دہشتگردوں کا حملہ, پولیس کی بھرپور جوابی کارروائی میں کالعدم تحریک طالبان گنڈا پور گروپ کا سرگرم دہشتگرد فتح ولد حنان ہلاک، پولیس پارٹی محفوظ رہی.
تفصیلات کے مطابق ڈیرہ اسماعیل خان کے تھانہ ہتھالہ کی حدود علاقہ ملنگ کے قریب فتنہ الخوارج کے دہشتگردوں نے پولیس پارٹی کو نشانہ بنانے کی کوشش کی جس پر پولیس نے بھرپور جوابی کارروائی کرتے ہوئے دہشتگردوں کا حملہ پسپا کر دیا۔ ڈیرہ پولیس کی جوابی کارروائی میں کالعدم تحریک طالبان گنڈاپور گروپ کا سرگرم دہشتگرد فتح ولد حنان جہنم واصل جبکہ دو مزید دہشتگرد زخمی ہوئے۔ واضح رہے پولیس نفری ٹکواڑہ کے علاقے میں ڈیوٹی سرانجام دینے کے بعد واپس آرہی تھی کہ دہشت گردوں نے حملہ کیا۔
ڈسٹرکٹ پولیس آفیسر ڈیرہ اسماعیل خان سجاد احمد صاحبزادہ کی قیادت میں ایس پی صدر، ڈیرہ پولیس کی تازہ دم نفری نے جائے وقوعہ پہنچ کر زخمی دہشتگردوں کی گرفتاری کے لئے سرچ اینڈ سٹرائیک آپریشن شروع کردیا ہے۔
انسپکٹر جنرل آف پولیس خیبرپختونخوا ذوالفقار حمید نے فتنہ الخوارج کے خلاف سیسہ پلائی دیوار ثابت ہونے پر ڈیرہ پولیس کی تعریف کی اور کامیاب کارروائی میں شامل افسران اور جوانوں کیلئے انعامات کا اعلان کیا۔ انہوں نے کہا کہ ملک عزیز بالخصوص صوبہ خیبرپختونخوا میں دیرپا امن کے قیام کے لئے دہشتگردوں کا ہر مقام تک پیچھا کر کے ٹھکانے لگایا جائیگا۔
