اسلام آباد: وفاقی حکومت نے لیفٹیننٹ جنرل محمد عاصم ملک کو قومی سلامتی کا نیا مشیر مقرر کردیا ہے، پاکستان میں پہلی بار آئی ایس آئی کے حاضر سروس سربراہ ملک کی قومی سلامتی کے مشیر بن گئے ہیں ۔
کابینہ ڈویژن کی جانب سے جاری نوٹی فکیشن میں کہا گیا ہے کہ جنرل عاصم ملک ڈی جی آئی ایس آئی کے عہدے پر برقرار رہیں گے، اور قومی سلامتی کے مشیر کا عہدہ ان کے پاس اضافی ہو گا ۔
نوٹی فکیشن میں کہا گیا ہے کہ لیفٹیننٹ جنرل محمد عاصم ملک ہلال امتیاز (ملٹری)، ڈی جی (آئی) فوری طور پر قومی سلامتی کے مشیر کا اضافی چارج سنبھالیں گے ۔
یہ پوسٹنگ ایسے وقت میں کی گئی ہے جب حال ہی میں پہلگام حملے کے بعد بھارت کے ساتھ کشیدگی میں اضافہ ہوا ہے ۔
این ایس اے کا عہدہ اپریل 2022 سے خالی تھا، جب سابق وزیر اعظم عمران خان کے اعتماد کا ووٹ ہارنے کے بعد پی ٹی آئی کی حکومت اپنا اعتماد کھو بیٹھی تھی، اس وقت معید یوسف این ایس اے کے طور پر خدمات انجام دے رہے تھے ۔
مشیر قومی سلامتی، وفاقی وزیر کا درجہ رکھتا ہے اور قومی سلامتی، خارجہ پالیسی اور سٹریٹجک امور کے معاملات پر وزیر اعظم کے پرنسپل مشیر کے طور پر کام کرتا ہے،مشیر قومی سلامتی اسلام آباد میں وزیراعظم سیکریٹریٹ میں قائم قومی سلامتی ڈویژن کے سربراہ بھی ہوتے ہیں ۔
