الیکشن کمشنر سندھ کا پریزائیڈنگ افسر سے الیکشن مٹیریل چھیننے کانوٹس لے لیا گیا ہے، ڈسٹرکٹ مانیٹرنگ افسر اور متعلقہ ریٹرننگ افسر سے رپورٹ طلب کرلی گئی ہے
اعلامیہ کے مطابق پولنگ اسٹیشن کے باہر رینجرز اور پولیس کی اضافی نفری کو تعینات کر دیا گیا ہے، الیکشن کمشنر سندھ کی جانب سے ملوث عناصر کیخلاف پولیس کو سخت کارروائی کی ہدایت کی گئی ہے۔اس حوالے سے الیکشن کمشنر سندھ کا کہنا ہے کہ انتخابات کی شفافیت پر سمجھوتہ نہیں کیا جائے گا۔
واضح رہے کہ کراچی کے علاقے ملیر سعود آباد میں رات گئے نامعلوم مسلح افراد نے پریزائیڈنگ افسر کو لوٹ لیا تھا۔کراچی کے علاقے ملیر سعود آباد میں پولیس کے مطابق ووٹنگ بکس بھی مسلح افراد پریزائیڈنگ افسر سے لوٹ کر لے گئے۔اسکول میں افسر عملے کے ساتھ داخل ہوا تو مسلح افراد آگئے۔پولیس کے مطابق واردات کے دوران قیمتی سامان،2 سے 3 بکس لوٹا گیا ہے، یہ واقعہ پاکستان پبلک اسکول میں پیش آیا تھا۔
یاد رہے کہ پاکستان کی تاریخ کے سب سے بڑے اور بارہویں آج عام انتخابات کیلئے پولنگ ہوگی۔ملک بھر کے قومی اور چاروں صوبائی اسمبلیوں کے 855 حلقے ہیں جن کیلئے ملک کی تاریخ کے سب سے زیادہ 17 ہزار 816 امیدوار میدان میں ہیں۔
جنرل نشستوں پر 882 خواتین امیدوار، 4 خواجہ سرا بھی الیکشن لڑ رہے ہیں۔آج حق رائے دہی 12 کروڑ 85 لاکھ 85 ہزار 760 ووٹرز استعمال کر سکیں گے۔جبکہ 25 سال تک عمر کے 2 کروڑ 35 لاکھ 18 ہزار371 نئے ووٹرزبھی شامل ہیں۔صبح 8 بجے سے شام 5 بجے تک پولنگ بغیر کسی وقفے کے جاری رہے گی۔ووٹرز کو ووٹ ڈالنے کیلئے اصل شناختی کارڈ دکھانا لازم ہوگا، صوبائی اسمبلی کیلئے سفید اور قومی اسمبلی کیلئے سبز بیلٹ پیپر ہو گا۔
