چیف آف ڈیفنس فورسز اور فیلڈ مارشل عاصم منیر نے کہا ہے کہ قانون و امن کا نفاذ پولیس کی مقدس امانت ہے، مضبوط اور عوام دوست پولیس داخلی سلامتی کے لیے ناگزیر ہے، مسلح افواج ہمیشہ پاکستان پولیس کے شانہ بشانہ کھڑی رہیں گی ۔
پاک فوج کے شعبہ تعلقات عامہ کی جانب سے جاری بیان کے مطابق چیف آف ڈیفنس فورسز سید عاصم منیر نے نیشنل پولیس اکیڈمی اسلام آباد کا دورہ کیا اور پولیس سروس آف پاکستان کے افسران سے ملاقات اور گفتگو کی ۔
اس موقع پر وفاقی وزیر داخلہ اور وزیر مملکت برائے داخلہ بھی موجود تھے، فیلڈ مارشل عاصم منیر کا کمانڈنٹ نیشنل پولیس اکیڈمی میں پُرتپاک استقبال کیا گیا ۔
فیلڈمارشل عاصم منیر کو مستعد پولیس دستے نےگارڈ آف آنر پیش کیا۔ فیلڈ مارشل نے پولیس شہداء کی یادگار پر پھول رکھے اور فاتحہ خوانی کی۔ فیلڈ مارشل عاصم منیر نے جانوں کا نذرانہ پیش کرنے والے پولیس کے شہداء کو خراج عقیدت پیش کیا ۔
فیلڈمارشل نے دہشت گردی، جرائم اور سکیورٹی چیلنجز کے خلاف جدوجہد میں پولیس اہلکاروں کی قربانیوں کو سراہا۔ فیلڈ مارشل نے آئی جیز، ایڈیشنل آئی جیز اور سینئر افسران سے خطاب کیا۔ فیلڈ مارشل نے بین الاداراتی تعاون اور جدید پولیسنگ کی اہمیت پر زور دیا ۔
آئی ایس پی آر کے مطابق فیلڈ مارشل نے عوامی اعتماد کو قانون نافذ کرنے والے اداروں کی بنیاد قرار دیتے ہوئے کہا کہ مضبوط اور عوام دوست پولیس داخلی سلامتی کے لیے ناگزیر ہے۔ قانون و امن کا نفاذ پولیس کی مقدس امانت ہے ۔
فیلڈ مارشل عاصم منیرکا کہنا تھا کہ مسلح افواج ہمیشہ پاکستان پولیس کے شانہ بشانہ کھڑی رہیں گی ۔
