فیفا ورلڈ کپ کے سنسنی خیز کوارٹر فائنل مرحلے میں انگلینڈ اور ارجنٹینا نے کامیابیاں سمیٹتے ہوئے سیمی فائنل کے لیے کوالیفائی کر لیا۔ تیسرے کوارٹر فائنل میں انگلینڈ نے ناروے کو 1-2 سے شکست دے کر آخری چار ٹیموں میں جگہ بنائی، جبکہ چوتھے کوارٹر فائنل میں ارجنٹینا نے سوئٹزرلینڈ کو 1-3 سے زیر کرکے سیمی فائنل کا ٹکٹ حاصل کیا۔
اس سے قبل اسپین اور فرانس بھی اپنے اپنے کوارٹر فائنل میچز جیت کر سیمی فائنل میں رسائی حاصل کر چکے تھے۔ اب ٹورنامنٹ کے سیمی فائنل میں چار بڑی فٹبال طاقتیں، فرانس، اسپین، انگلینڈ اور ارجنٹینا آمنے سامنے ہوں گی، جس کے باعث شائقین کو مزید دلچسپ اور اعلیٰ معیار کی فٹبال دیکھنے کو ملے گی۔
ورلڈ کپ کے سیمی فائنل مقابلوں میں فرانس کا سامنا اسپین سے ہوگا، جبکہ دوسرے سیمی فائنل میں انگلینڈ اور ارجنٹینا مدِمقابل ہوں گے۔ دونوں میچوں کے فاتحین فائنل میں جگہ بنائیں گے، جبکہ شکست کھانے والی ٹیمیں تیسری پوزیشن کے میچ میں ایک دوسرے کے مدمقابل ہوں گی۔
فٹبال ماہرین کے مطابق سیمی فائنل مرحلہ عالمی فٹبال کے دو روایتی حریفوں، اسپین اور فرانس، کے ساتھ ساتھ انگلینڈ اور ارجنٹینا کے درمیان بھی انتہائی سخت اور دلچسپ مقابلوں کی نوید دے رہا ہے۔ دنیا بھر کے کروڑوں شائقین کی نظریں اب ان مقابلوں پر مرکوز ہیں، جہاں ہر ٹیم عالمی چیمپئن بننے کے خواب کو حقیقت میں بدلنے کی کوشش کرے گی۔
