ایبٹ آباد: ناران جانے والے سیاحوں پر مبینہ تشدد اور بھتہ طلبی کے کیس میں ایکسائز کے سب انسپکٹر نسیم خان کو گرفتار کر لیا گیا، جبکہ دیگر ملزمان کی تلاش جاری ہے۔
پولیس کے مطابق سیاح عمران آفریدی کی مدعیت میں تھانہ کینٹ ایبٹ آباد میں مقدمہ درج کیا گیا ہے۔ ایف آئی آر میں مؤقف اختیار کیا گیا ہے کہ ایکسائز اہلکاروں نے سیاح اور اس کے دوستوں کو حراست میں لے کر مبینہ طور پر تشدد کا نشانہ بنایا۔
مدعی کے مطابق سب انسپکٹر نسیم خان کی کال پر سیاحوں سے 5 لاکھ روپے طلب کیے گئے۔ ایف آئی آر میں الزام عائد کیا گیا ہے کہ رقم ادا نہ کرنے پر متاثرین کو ڈنڈوں سے مارا گیا اور انہیں ہراساں کیا گیا۔
کینٹ پولیس نے سب انسپکٹر نسیم خان سمیت 10 نامعلوم افراد کے خلاف مقدمہ درج کر لیا ہے۔ مقدمہ درج ہونے کے بعد مرکزی ملزم نسیم خان کو گرفتار کر لیا گیا، جبکہ واقعے میں ملوث دیگر افراد کی گرفتاری کے لیے کارروائیاں جاری ہیں۔
پولیس حکام کا کہنا ہے کہ واقعے کی مختلف پہلوؤں سے تفتیش کی جا رہی ہے اور شواہد کی روشنی میں مزید قانونی کارروائی عمل میں لائی جائے گی۔ سیاحوں پر مبینہ تشدد اور بھتہ طلبی کے الزامات سامنے آنے کے بعد متعلقہ اداروں نے بھی معاملے کا نوٹس لے لیا ہے۔
