نوشکی کی قومی شاہراہ این 40 پر سیکیورٹی فورسز کی قافلے کے قریب دھماکے سے 7 افراد شہید جبکہ درجنوں زخمی ہوگئے ہیں۔
پولیس کے مطابق کوئٹہ تفتان شاہراہ پرفلوم مل کے قریب ایف سی کے کانوائے کے قریب دھماکا ہوا، پولیس اور سیکیورٹی فورسز کی ٹیمیں جائے وقوعہ پر پہنچ گئی۔ اسپتال ذرائع کے مطابق دھماکے میں 7 افراد شہید جبکہ 40 سے زائد زخمی ہوئے ہیں۔ جنہیں کوئٹہ منتقل کرنے کے لیے ہیلی کاپٹر نوشکی پہنچا دیے گئے ہیں۔
سیکیورٹی ذرائع کا کہنا ہے کہ دہشت گردوں نے نوشکی میں صبح سویرے ایف سی قافلے پر حملہ کیا۔ کانوائے کو بارودی مواد سے نشانہ بنایا گیا جبکہ خود کش حملہ بھی کیا گیا۔ سیکیورٹی فورسز نے حملہ آوروں کے خلاف فوری مؤثر جوابی کارروائی کی جس میں خود کش حملہ آور کے علاوہ 3 مزید دہشت گرد بھی ہلاک کردیئے گئے۔ خودکش حملے میں ایف سی کے تین جوان اور دو عام شہری شہید ہوئے۔
ذرائع کے مطابق سیکیورٹی فورسز نے علاقے کو گھیرے میں لے کر کلیئرنیس آپریشن شروع کر دیا ہے۔ دہشت گردوں کے بھاگنے والے تمام راستے بلاک کردیئے گئے ۔ علاقے سے آخری دہشت گرد کے خاتمے تک کلیئرنس آپریشن جاری رہے گا۔
واضح رہے کہ گزشتہ رات کوئٹہ میں مختلف مقامات پر تین زوردار دھماکے ہوئے، جن میں ایک دھماکا شالکوٹ تھانے کے علاقے کرانی روڈ پر اے ٹی ایف کی گاڑی کے قریب ہوا، جس کے نتیجے میں 7 اہلکار زخمی ہوئے جن میں سے ایک دم توڑ گیا۔
دوسرا واقعہ قمبرانی روڈ پر پیش آیا، جہاں نامعلوم افراد نے ایک موبائل کی دکان پر دستی بم سے حملہ کیا۔ پولیس ذرائع کے مطابق اس حملے میں کسی جانی یا مالی نقصان کی اطلاع نہیں ملی۔ تیسرا دھماکہ ایئرپورٹ روڈ کے علاقے کلی شابو میں سنا گیا۔
