اندور: بھارتی ریاست مدھیہ پردیش کے شہر اندور میں ایک خاندان میں 52 برس بعد بیٹی کی پیدائش نے خوشیوں کا سماں باندھ دیا، جہاں نومولود بچی کی آمد پورے خاندان کے لیے ایک جذباتی اور یادگار لمحہ بن گئی۔
رپورٹس کے مطابق خاندان میں گزشتہ پانچ دہائیوں سے کسی بیٹی کی پیدائش نہیں ہوئی تھی، جس کے باعث جیسے ہی بچی کی آمد کی خبر ملی، اہلِ خانہ اپنی خوشی پر قابو نہ رکھ سکے۔ خاندان کے افراد ایک دوسرے سے گلے ملتے، خوشی کے آنسو بہاتے اور نومولود کا پرتپاک استقبال کرتے نظر آئے۔
اس دل کو چھو لینے والے منظر کی ویڈیو سوشل میڈیا پر بھی تیزی سے وائرل ہو رہی ہے، جہاں صارفین کی بڑی تعداد نومولود بچی اور اس کے اہلِ خانہ کو مبارکباد، نیک تمناؤں اور دعاؤں سے نواز رہی ہے۔
سوشل میڈیا پر متعدد صارفین نے اس واقعے کو بیٹیوں کی اہمیت اجاگر کرنے اور ان کی پیدائش پر خوشی منانے کی ایک مثبت مثال قرار دیا۔ ان کا کہنا ہے کہ ایسے واقعات معاشرے میں بیٹیوں کے حوالے سے مثبت سوچ کو فروغ دینے میں اہم کردار ادا کرتے ہیں۔
واضح رہے کہ بھارت کے بعض علاقوں میں روایتی طور پر بیٹے کی پیدائش کو زیادہ اہمیت دی جاتی رہی ہے، تاہم اس خاندان کی خوشی نے بیٹیوں کے مقام اور ان کی قدر و منزلت کے حوالے سے ایک مثبت پیغام دیا ہے۔
