آج ملک بھر میں رمضان المبارک کا پہلا روزہ رکھا جا رہا ہے۔ گزشتہ شب رویت ہلال کمیٹی کو دو سو سے زائد شہادتیں موصول ہونے کے بعد رمضان المبارک کے آغاز کا باضابطہ اعلان کیا گیا تھا۔ پاکستان کے علاوہ بھارت، بنگلہ دیش سمیت دنیا کے مختلف ممالک میں بھی آج پہلا روزہ رکھا جا رہا ہے۔
رحمتوں اور برکتوں کے مہینے رمضان المبارک کے آغاز کے ساتھ ہی ملک بھر کی مساجد نمازیوں سے بھر گئیں۔ شہریوں نے پہلے روزے کے لیے خصوصی تیاریاں کیں، جبکہ گھروں اور مساجد میں قرآن پاک کی تلاوت اور ذکر و اذکار کا سلسلہ شروع ہو گیا ہے۔
رمضان المبارک کے دوران عام مہینوں کی نسبت عبادات میں اضافہ دیکھنے میں آتا ہے۔ علماۓ کرام نے اپنے بیانات میں روزے کے دوران بہترین اخلاق اپنانے اور ان عادات کو پورا سال جاری رکھنے کی تلقین کی ہے۔ انہوں نے صاحبِ استطاعت افراد پر زور دیا ہے کہ وہ اس بابرکت مہینے میں غریبوں اور ناداروں کا خصوصی خیال رکھیں اور صدقات و خیرات میں اضافہ کریں۔
دوسری جانب شہریوں نے افطار کی تیاریوں کا بھی آغاز کر دیا ہے، جس کے باعث بازاروں میں خریداری کا سلسلہ جاری ہے اور اشیائے خورد و نوش کی دکانوں پر رش دیکھنے میں آ رہا ہے۔ رمضان المبارک کے آغاز پر ملک بھر میں روحانی فضا قائم ہے اور ہر طرف عبادت و بندگی کا سماں ہے۔
