برآمدات پر مبنی شعبوں کو مضبوط بنانا حکومت کی معاشی حکمتِ عملی ہے، وفاقی وزیر خزانہ محمد اورنگزیب

وفاقی وزیر خزانہ محمد اورنگزیب سے پاکستان ریجنل اکنامک فورم کے چیئرمین ہارون شریف کی قیادت میں ٹیکسٹائل اور ملبوسات کے برآمدکنندگان اور صنعت سے وابستہ رہنماؤں کے ایک وفد نے ملاقات کی۔
وزیرِ خزانہ نے اس موقع پر کہا کہ برآمدات پر مبنی شعبوں کو مضبوط بنانا پاکستان کی معاشی بحالی کی حکمتِ عملی کا بنیادی حصہ ہے۔ انہوں نے کہا کہ پیداواری صلاحیت میں اضافہ، جدت کو فروغ دینا اور پاکستانی صنعتوں کی عالمی مسابقت کو بہتر بنانا برآمدات میں اضافے، روزگار کے مواقع پیدا کرنے اور پائیدار معاشی ترقی کے لیے ناگزیر ہے۔
انہوں نے کہا کہ حکومت کاروباری برادری کے ساتھ قریبی رابطہ برقرار رکھنے کے لیے پرعزم ہے تاکہ معاشی پالیسیاں صنعت و تجارت کی ضروریات کے مطابق ہوں اور پائیدار و جامع ترقی کو فروغ دیا جا سکے۔ وزیرِ خزانہ نے کہا کہ سرمایہ کاری کے فروغ، اور صنعتی توسیع میں حائل رکاوٹوں کو دور کرنے کے لیے پالیسی فریم ورک کو مسلسل بہتر بنایا جا رہا ہے۔