اسلام آباد: محکمہ موسمیات کی جانب سے جاری بیان کے مطابق آج سے ملک کے بیشتر علاقوں میں سردی کی لہر بڑھنے کی توقع ہے ، اسلام آباد اور گردونواح میں تیز ہواؤں اور گرج چمک کےساتھ بارش کا امکان ہے، راولپنڈی، اٹک، جہلم، چکوال، لاہور، فیصل آباد میں گرج چمک کے ساتھ بادل برسیں گے ۔
بیان کے مطابق مری، گلیات اور گر دو نواح میں ہلکی سے درمیانی بارش اور برفباری کی پیشگوئی ہے جبکہ چترال، دیر، سوات اور مالاکنڈ، میں بارش جبکہ پہاڑوں پر برف باری متوقع ہے۔
محکمہ موسمیات کا کہنا ہے کہ سندھ کے بیشتر اضلاع میں موسم سرد اورخشک رہنے کا امکان ہے جبکہ بلوچستان کے بیشتر اضلاع میں موسم سرد رہے گا، کشمیر اور گلگت بلتستان میں بارش جبکہ پہاڑوں پر برف باری کا امکان ہے۔
محکمہ موسمیات نے مزید کہا ہے کہ گزشتہ روز سب سے کم درجہ حرارت لہہ میں منفی 10 اور اسکردو میں منفی 9 ڈگری سینٹی گریڈ ریکارڈ کیا گیا۔
