اسلام آباد: سعودی عرب نے عازمین حج عمر پابندی سے متعلق بڑا فیصلہ کرتے ہوئے 15 سال سے کم عمر افراد پر عائد پابندی واپس لے لی ہے۔
ترجمان وزارت مذہبی امور کے مطابق پاکستان حج مشن نے سعودی عرب کی نئی ہدایات پر مبنی مراسلہ جاری کر دیا ہے۔ نئی ہدایات کے تحت اب 12 سال سے زائد عمر کے عازمین حج پر جا سکیں گے۔
وزارت مذہبی امور نے واضح کیا ہے کہ 12 سال کی عمر کی حد والی پالیسی بدستور برقرار رہے گی۔
اس سے قبل سعودی عرب نے حج 2026 کے لیے عمر کی سخت پابندی نافذ کی تھی۔ اس پالیسی کے مطابق 27 مئی 2026 (9 ذوالحجہ، یوم عرفہ) تک 15 سال سے کم عمر افراد کو حج کی اجازت نہیں دی گئی تھی۔
اس فیصلے پر عملدرآمد کے لیے پاکستان کے تمام ایئرپورٹس پر امیگریشن سمیت متعلقہ اداروں کو سخت ہدایات جاری کی گئی تھیں۔ کم عمر عازمین کو حج پروازوں میں سوار ہونے سے روکا جا رہا تھا اور ان کے ویزے منسوخ تصور کیے جا رہے تھے۔
مزید برآں، سعودی حکام نے متاثرہ عازمین کو ہدایت دی تھی کہ وہ اپنی درخواست منسوخ کر کے مکمل رقم واپس حاصل کر سکتے ہیں۔
تاہم، نئی پالیسی کے بعد صورتحال تبدیل ہو گئی ہے اور اب 12 سال سے زائد عمر کے عازمین حج کی ادائیگی کے لیے سعودی عرب جا سکیں گے۔
حکام نے عازمین کو مشورہ دیا ہے کہ وہ تازہ ترین ہدایات سے آگاہ رہیں اور سفر سے قبل اپنی بکنگ اور دستاویزات کی تصدیق ضرور کریں۔
