ہنگو کے علاقے دوآبہ میں پولیس اور ٹل سکاوٹس کا دہشتگردوں کے خلاف ٹارگٹڈ آپریشن، پولیس کے مطابق کارروائی میں 9 دہشتگرد ہلاک ہوگئے ۔
پولیس کے مطابق علاقہ زرگیری، شناوڑی سمیت دیگر علاقوں میں خارجی دہشتگردوں کی موجودگی کی اطلاع پر ٹارگٹڈ آپریشن کیا گیا ۔
پولیس حکام کا کہنا ہے کہ آپریشن کے دوران 5 خارجی دہشتگرد ہلاک ہو گئے، دہشتگردوں کے ساتھ فائرنگ کے تبادلے میں ڈسٹرکٹ پولیس آفیسر خالد خان اور ایس ایچ او دوآبہ نبی خان زخمی ہو گئے ۔
پولیس حکام کا مزید کہنا ہے کہ دہشتگردوں کی فائرنگ سے زخمی ڈی پی او خالد خان مزید علاج کیلئے سی ایم ایچ کوہاٹ منتقل کردیا گیا ہے ۔
پولیس اور ایف سی نے ہنگو میں دہشتگردوں کی اطلاع پر بڑے پیمانے پر آپریشن شروع کر دیا ہے، علاقے میں کرفیو نافذ ہے اور قانون نافذ کرنے والے ادارے بھی مختلف مقامات پر تعینات ہیں ۔
دوسری جانب انسپکٹرجنرل خیبرپختونخوا پولیس ذوالفقار حمید کا کہنا ہے کہ ڈی پی او ہنگو دہشتگردوں کے خلاف آپریشن کر رہے تھے، آپریشن کے دوران متعدد دہشتگرد مارے گئے اور کئی زخمی ہوئے، ڈی پی او ہنگو کو بھی گولی لگی ہے تاہم ان کی حالت خطرے سے باہر ہے ۔
آئی جی خیبرپختونخوا نے کہا کہ ڈی پی او سے بات کی ہے، ان کے حوصلے بلند ہیں، دہشتگردوں کے خلاف کارروائیاں جاری رکھیں گے ۔
