بھارتی گلوکار ارجیت سنگھ کانسرٹ میں ماہرہ خان کو پہچان نہ سکے،جس کے بعد انہوں نے اداکارہ سے معافی بھی طلب کی۔
دبئی میں ہونے والے میوزیکل کانسرٹ میں پاکستانی اور بھارتی فنکاروں کے درمیان پیش آیا ایک دلچسپ واقعہ جس کو کیمرے کی آنکھ نے محفوظ کرلیا۔جس کی ویڈیوز سوشل میڈیا کی زینت بنی ہوئی ہیں۔ماہرہ خان ان دنوں ایمی گالہ ایوارڈز کے سلسلے میں دبئی میں موجود ہیں، اسی دوران ان کو انہیں گزشتہ روز میں ارجیت سنگھ کے کانسرٹ میں دیکھا گیا جس میں بھارتی گلوکار ارجیت سنگھ یہ اعتراف کرتے ہیں کہ وہ کانسرٹ میں موجود سیکڑوں شائقین کے درمیان موجود ماہرہ خان کو پہچان نہیں سکےلیکن ان کو جیسے ہی اندازہ ہوا کہ شائقین کے درمیان پاکستانی سپر اسٹار موجود ہیں تو انہوں نے کانسرٹ کے دیگر شرکا کو بھی ان سے متعارف کروایا اور ساتھ ہی ماہرہ خان سے شناخت میں تاخیر پر معافی بھی مانگ لی۔
وائرل ویڈیو میں واضح دیکھا جاسکتا ہے کہ بھارتی گلوکار اچانک اپنا کانسرٹ روک دیتے ہیں اور وہاں پر موجود سامعین سے مخاطب ہوکر کہتے ہیں کہ ’آپ کو یہ جان کر بہت حیرانی ہوگی کہ آج ہم سب کےدرمیان کون موجود ہے، آئیے انہیں اچھے انداز میں متعارف کرواتے ہیں، کیا ہم ان کی طرف کیمرہ کرسکتے ہیں’۔ارجیت سنگھ نے اپنی بات جاری رکھتے ہوئے مزید کہا کہ میں انہیں پہچاننے کی کوشش کر رہا تھا، پھر مجھے یاد آیا کہ میں نے تو ان کے لیے گانا گایا، خواتین و حضرات ہم سب کے درمیان ماہرہ خان موجود ہیں، جو میرے سامنے بیٹھی ہیں۔مزید گلوکار نے کہا کہ میں ابھی ان ہی کی فلم کا گانا ’ظالمہ‘ گا رہا تھا اور یہ میرے ساتھ کھڑی ہوکر گنگنا رہی تھیں اور میں ان کو پہچان نہ سکا جس پر میں ان سے معذرت خواہ ہوں، آپ کا بہت بہت شکریہ۔اس موقع پر ماہرہ خان نے سیاہ لباس کا انتخاب کیا جو کہ ان کی خوبصورتی میں مزید اضافہ کر رہا تھا۔دوسری طرف ماہرہ نے بھی اس کانسرٹ کی مختصر ویڈیو اپنے انسٹاگرام اکاؤنٹ سے بھی شیئر کی اور بھارتی گلوکار ارجیت سنگھ کی عاجزی پر ان کی خوب تعریف بھی کی ہے۔
