وزیراعظم شہبازشریف نے خیبرپختونخوا کے قبائلی علاقے ضلع خیبر میں وادی تیراہ میں پُرامن مظاہرین اور بے گناہ شہریوں کے جاں بحق ہونے پر افسوس کا اظہار کیا ہے ۔
اسلام آباد: وزیراعظم ہاؤس کی جانب سے جاری بیان کے مطابق وزیر اعظم نے وادی تیراہ کے علاقے باغ میدان میں گزشتہ روز دہشتگردوں کی فائرنگ سے بے گناہ معصوم اور پر امن شہریوں کے جاں بحق ہونے پر اظہار افسوس کیا ۔
وزیر اعظم نے زخمیوں کو فوری طبی امداد فراہم کرنے کی ہدایات دیں جبکہ دہشتگردوں کی جانب سے پُرامن شہریوں کو نشانہ بنانے کی شدید الفاظ میں مذمت کی ۔
وزیراعظم نے کہا کہ دہشت گردوں کے مکروہ عزائم ہمارے عزم کو متزلزل نہیں کر سکتے، دہشت گردوں اور دہشت گردی کو منطقی انجام تک پہنچا کر دم لیں گے ۔
دوسری جانب آئی جی خیبر پختونخوا نارتھ نے ایف سی ہسپتال میں وادی تیراہ میں دہشتگردوں کی فائرنگ سے ہونے والے زخمیوں کی عیادت کی اور اُن کی جلد صحت یابی کیلیے دعا کی ۔
میجر جنرل راؤ عمران سرتاج نے فرنٹیئر کور ٹیچنگ اسپتال میں وادی تیراہ کے زخمیوں کی عیادت کی، زخمیوں نے آئی جی ایف سی نارتھ کو دہشتگردوں کی فائرنگ کے بارے میں تفصیل سے آگاہ کیا اور علاج پر اطمینان کا اظہار کیا ۔
واقعے کے زخمیوں نے دہشتگردوں سے اپنے علاقے کو پاک کرنے اور ایک فوج کے شانہ با شانہ شدت پسندوں کے خلاف لڑنے کے عزم کو دہرایا جبکہ پاک فوج اور ایف سی نارتھ کا مفت علاج معالجہ فراہم کرنے پر شکریہ ادا کیا ۔
