وفاقی وزیر داخلہ محسن نقوی نے افغان دارالحکومت کابل میں افغان ہم منصب سراج الدین حقانی سے اہم ملاقاتکی ہے ، ملاقات میں پاک افغان تعلقات، بارڈر مینجمنٹ، کالعدم ٹی ٹی پی اور دو طرفہ تعلقات سیمت خطے کی سیکیورٹی صورتحال پر بات چیت ہوئی ہے ۔
کابل انٹرنیشنل ائیرپورٹ پہنچنے پر افغانستان کے نائب وزیر داخلہ محمد نبی عمری نے وزیر داخلہ محسن نقوی کا استقبال کیا، افغانستان کی وزارت داخلہ کے اعلیٰ حکام بھی اس موقع پر موجود تھے ۔
وزیرداخلہ کی افغان دارالحکومت کابل میں افغانستان کے ہم منصب سراج الدین حقانی سے اہم ملاقات ہوئی ،اس دوران دونوں رہنماؤں کے درمیان دوطرفہ تعلقات، انسداد دہشت گردی، دراندازی اور کالعدم تحریک طالبان پاکستان کے حوالے سے تبادلہ خیال کیا گیا، دونوں رہنماؤں نے پاک افغان بارڈر منیجمنٹ اور دہشت گردی کے خاتمہ کےلیے باہمی تعاون مضبوط کرنے پر اتفاق کیا ۔
ملاقات میں پاک افغان سرحد کی مؤثر منیجمنٹ، منشیات کی روک تھام، سرحد پار نقل و حرکت کو منظم کرنےکے طریقہ کار سمیت پاکستان میں غیر قانونی طور پر مقیم افغان شہریوں کے وطن واپسی کے عمل پر بھی گفتگو ہوئی ۔
وزیرداخلہ محسن نقوی نے واضح کیا کہ دہشت گرد تنظیمیں فساد اور عدم استحکام کا باعث بن رہی ہیں، ہم سب کو مل کر اسے روکنا ہوگا، پاکستان افغانستان کے ساتھ برادرانہ اور دیرپا تعلقات کا خواہاں ہے ۔
