افغان میڈیا کی جانب سے دعویٰ کیا گیا ہے کہ ایرانی صوبے سیستان و بلوچستان میں فائرنگ سے 260 افغان شہری جاں بحق ہوگئے ہیں۔
افغان میڈیا کے مطابق افغان شہری غیر قانونی طریقے سے ایران میں داخل ہونے کی کوشش کر رہے تھے، ایران میں داخل ہونے والے افغان شہریوں کو ہلکے اور بھاری ہتھیاروں سے نشانہ بنایا گیا۔
افغان میڈیا نے کہا کہ ان افراد کو گزشتہ اتوار کے روز نشانہ بنایا گیا ہے اور اس حوالے سے ایران فورسز نے ویڈیو بھی جاری کی ہے جس میں جاں بحق افراد کو دیکھا جا سکتا ہے ۔
ایران میں کام کرنے والی انسانی حقوق کی تنظیم کے مطابق ایران میں داخلے کی کوشش کرنے والے افغانوں کی تعداد 300 تھی، ایرانی بارڈرگارڈز نے پہاڑوں میں چھپ کر افغان شہریوں کو نشانہ بنایا۔
انسانی حقوق کی تنظیم کا مزید کہنا تھا کہ ایرانی بارڈر گارڈز کی فائرنگ سے صرف 50 افغان شہری بچ سکے۔
افغان عینی شاہد کا بتانا ہے کہ ہمیں ایران کے علاقے کلگان سراوان میں نشانہ بنایا گیا، ہمارے قافلے میں 300 افراد تھے جن میں سے 270 یا 280 مارے گئے۔
افسوسناک واقعے پر افغانستان کی عبوری حکومت کا ردعمل بھی سامنے آیا ہے ، ترجمان افغان حکومت ذبیح اللہ مجاہد نے کہا ہے کہ واقعے کی تحقیقات کر رہے ہیں ۔
ذبیح اللہ مجاہد نے کہا کہ افغانستان کے حکومتی ادارے اور سفارتی مشنز اس حوالے سے تحقیقات کررہے ہیں۔
