ایران کے سپریم لیڈر آیت اللّٰہ خامنہ ای نے اسرائیل کو ایک اور وارننگ دیتے ہوئے خبردار کیا ہے کہ ایران کا اگلا حملہ اس سے کہیں زیادہ تکلیف دہ ہو گا۔ انہوں نے اسرائیل پر حملے کے بعد سماجی رابطے کی ویب سائٹ ایکس پر اپنے بیان میں اسرائیل کو یہ وارننگ دی۔ آیت اللّٰہ خامنہ ای نےکہا کہ اللّٰہ کی مدد سے جو ضرب صیہونی ریاست کو لگائی جائے گی وہ اس سے کہیں زیادہ شدید اور تکلیف دہ ہوگی۔ حیران کن طور پر آیت اللہ خامنہ ای نے سوشل میڈیا پر یہ پوسٹ عبرانی زبان میں کی ہے۔
اس سے قبل سپریم لیڈر کے ایکس کے آفیشل اکاؤنٹ سے آرٹیفیشل انٹیلی جنس کی مدد سے بنی میزائلوں کی تصویر پوسٹ کی گئی اور اس پر ’نصر من اللہ و فتح قريب‘ لکا ہوا ہے۔
واضح رہے کہ ایران نے اسرائیل پر 400 سے زائد بیلسٹک میزائلوں سے حملہ کیا ہے ۔ میزائیل اصفہان، تبریز، خرم آباد، کرج اور اراک سے فائر کیے گئے۔ حملے کے بعد مقبوضہ بیت المقدس سمیت اسرائیل بھر میں سائرن بجنے لگے جبکہ اسرائیلی بنکرز میں پناہ لینے کے لیے بھاگنے لگے۔
حملوں کے باعث اسرائیل کی فضائی حدود بند کردی گئیں اور ہوائی اڈوں پر موجود تمام مسافروں کو محفوظ مقامات پر منتقل کر دیا گیا ہے۔ دوسری جانب تہران ٹائمز کے مطابق ایران نے میزائل حملوں میں اسرائیل کے ایف 35 جہازوں کے اڈے نیو اٹم ایئر بیس کو نشانہ بنایا۔
