صوبہ بلوچستان کے ضلع خاران میں سیکیورٹی فورسز نے دہشتگردوں کے خلاف کامیاب کارروائی کرتے ہوئے چار دہشتگردوں کو ہلاک جبکہ دو کو زخمی حالت میں گرفتار کر لیا۔
سیکیورٹی ذرائع کے مطابق یہ کارروائی خفیہ اطلاع کی بنیاد پر کی گئی، جس کے دوران فورسز نے دہشتگردوں کے ٹھکانے کو نشانہ بنایا۔ فائرنگ کے تبادلے میں چار دہشتگرد موقع پر ہی مارے گئے جبکہ دو زخمی ہو کر فورسز کے قبضے میں آ گئے۔
ذرائع کا کہنا ہے کہ گرفتار دہشتگردوں سے مزید تفتیش جاری ہے، جس سے اہم معلومات حاصل ہونے کی توقع ہے۔
سیکیورٹی حکام کے مطابق علاقے میں دہشتگردوں کے مکمل خاتمے کے لیے سرچ آپریشن تاحال جاری ہے، اور کسی بھی ممکنہ خطرے سے نمٹنے کے لیے فورسز چوکس ہیں۔
واضح رہے کہ ملک کے دیگر حصوں کی طرح بلوچستان میں بھی دہشتگردی کے خلاف کارروائیاں تسلسل کے ساتھ جاری ہیں تاکہ امن و امان کی صورتحال کو بہتر بنایا جا سکے۔
