خیبر پختونخوا کے مسائل پر گورنر فیصل کریم کنڈی، وزیراعلیٰ سہیل آفریدی اور اپوزيشن لیڈرڈاکٹر عباد ایک پیج پر آگئے، الگ الگ سیاسی جماعتوں سے تعلق رکھنے والے تینوں رہنماوں نے مشترکہ طور پر وفاق سے صوبے کے حقوق ادا کرنے کا مطالبہ کردیا ۔
پشاور میں گورنر خیبر پختونخوا فیصل کریم کنڈی، وزیراعلیٰ سہیل آفریدی اور اپوزیشن لیڈر صوبائی اسمبلی عباداللہ خان نے مشترکا پریس کانفرنس کی اور وفاقی حکومت سے صوبے کے حقوق ادا کرنے کا مطالبہ کردیا ۔
مشترکہ پریس کانفرنس سے خطاب میں گورنر فیصل کریم کنڈی نے وفاق کو مخاطب کرتے ہوئے سوال کیا کہ کیا ہمارا گناہ یہ ہےکہ ہم آپ کو گیس اور بجلی پیدا کرکے دے رہے ہیں ؟
گورنر فیصل کریم کنڈٰ کا کہنا تھا کہ ہمارا صوبہ ریاست کو سستی گیس اور بجلی دے رہا ہے، مائینز ہمارے پاس ہیں، ہمیں پانی کا شیئر مل جائےتو ہمیں گندم لینی کی ضرورت نہیں، درخواست ہےکہ اس مسئلے پر نوٹس لیں، ہمارے صوبےکیساتھ زیادتی ہوگی تو ہم عوام کے ساتھ کھڑے ہیں ۔
انہوں نے وزیراعظم سے اپیل کرتے ہوئے کہا صوبےکے مسائل کےحل میں بھی شہباز کی سپیڈ سےکام کریں، یہاں غریب کو روٹی نہیں ملےگی، سی این جی نہیں ملےگی تو یہ کہاں جائیں گے؟ اس وقت بڑے بھائی کا کردار کمزور ہے، بڑے بھائی کو اپنا کردار ادا کرنا ہوگا ۔
مشترکہ پریس کانفرنس سے اپنے خطاب میں وزیراعلیٰ سہیل آفریدی نے وفاقی حکومت کے مختلف منصوبوں میں رویےکو غیرقانونی و غیرآئینی قرار دیا اور کہا کہ صوبے کو آٹا فراہم نہيں کیا جارہا، ہم ریاست کو سستی گیس اور بجلی دے رہے ہیں لیکن ہمارے سی این جی سٹیشنز بند کیے جا رہے ہيں ۔
سہیل آفریدی نے وزیراعظم کو سی این جی اسٹیشنز کی بندش پر خط بھی لکھ دیا اور کہا کہ سی این جی بندش سے ہزاروں افراد کے روزگار متاثر ہونے کا خدشہ ہے ۔
انہوں نے کہا میرا سب سے ایک ہی مطالبہ ہےکہ غیرقانونی اقدامات میں وفاقی حکومت کا ساتھ نہ دیں، صوبے میں وفاق کی کاموں کے لیے ہم بریج فنانسنگ بھی کررہے ہیں، صوبے میں گیس کی بندش مکمل طور پر غیر قانونی اقدام ہے، گیس بندش کے سلسلے میں کسی بھی غیر آئینی اقدام میں وفاق کا ساتھ نہ دیں، وفاق نےکے پی سے زیادتی کرتے ہوئے قبائلی اضلاع کے 12 ارب روپے بھی کاٹے ہیں ۔
اس موقع پر اپنے خطاب میں صوبائی اسمبلی میں اپوزیشن لیڈر عباد اللہ نے کہ ہم سمجھتے ہیں کہ وفاقی حکومت کام کر رہی ہے لیکن مسائل بھی توجہ طلب ہیں ۔
انہوں نے پریس کانفرنس کرتے ہوئے سب کو اکھٹا کرنے پر اسپیکر کے پی اسمبلی کا شکریہ ادا کرتے ہوئے کہا کہ یہ صوبہ ہم سب کا ہے اور ہم سب مل کر اپنا ان پُٹ دیں گے ۔
