مسلم لیگ ( ن)، پاکستان پیپلز پارٹی، جمعیت علمائے اسلام اور عوامی نیشنل پارٹی سمیت اپوزیشن کی جماعتوں نے صوبائی حکومت کی آل پارٹیز کانفرنس میں شرکت نہ کرنے کا اعلان کردیا ۔
پشاور: خیبرپختونخوا اسمبلی میں اپوزیشن لیڈر اور مسلم لیگ ن کے رہنما ڈاکٹر عباداللہ خان نے کہا ہے کہ تمام اپوزیشن جماعتوں نے کل ہونے والی حکومتی کُل جماعتی کانفرنس میں شرکت نہ کرنے کا متفقہ فیصلہ کیا ہے ۔
انہوں نے کہا کہ صوبائی حکومت کے فیصلے غیر سنجیدہ ہیں، صرف ایک میز پر بیٹھنے سے مسائل حل نہیں ہوتے، عوامی مسائل کے حل کیلئے عملی اقدامات ناگزیر ہیں، اسمبلی کے فلور پر مکمل اور شفاف ڈیبیٹ ہونی چاہیے ۔
پاکستان پیپلز پارٹی صوبائی صدر محمد علی شاہ باچا کا کہنا ہے کہ صوبے میں غیر سنجیدہ حکومت ہے، یہ آل پارٹیز کانفرنس صرف دکھاوا ہے ۔
انہوں نےکہا کہ حکومت سنجیدہ ہوتی تو اس سے قبل کئی بار امن و امان اور دیگر مسائل پر بات ہو چکی ہے لیکن کوئی نتیجہ برآمد نہیں ہوا ۔
محمد علی شاہ باچا کا کہنا تھا کہ صوبائی حکومت اپنے دھرنوں اور مظاہروں سے فارغ ہو تو عوامی مسائل کی جانب توجہ دے ۔
عوامی نیشنل پارٹی نے بھی وزیر اعلیٰ خیبرپختونخوا کی طلب کردہ اے پی سی میں شرکت سے معذرت کی ہے اور کہا ہے کہ اے پی سی حکومت نے بلائی ہے اس میں شرکت نہیں کریں گے ۔
حکومتی کُل جماعتی کانفرنس میں شرکت نہ کرنے کا اعلان کرتے ہوئے اے این پی کے صوبائی صدر میاں افتخار حسین کا کہنا تھا کہ حکومت اپنے فیصلے کرچکی ہے کانفرنس میں شرکت کا کوئی فائدہ نہیں ۔
